Revirar mos cors de psicologia dau trabalh en occitan dau lemosin

Sei, en mai de las mias activitats professionalas, dins los maines paramedicau e sociau, e de léser dins lu maine occitanista, un (vielh) estudiant en psicologia dau trabalh e de las organizacions, e...a sí fòrt qu'avance dins l'estudis, me sei dich," filh de loira de goiat",  aime talament ma brava linga que, me pense, seria interessant de far coma se..." far coma se la linga podia tot exprimir en oblidar en-plen lu seu estatut de linga menoresada e sens oficialitat d'auei, "bona per parlar a las bestias e butar la chançon" (enquera que chantar emb un bon veire de Monbazalhac o de Juranson dins la man dirai pas de non).

E, laidonc, "far coma se", coma se per eisemple e d'efiech, la psicologia dau trabalh e de las organisacions s'ensenharia naturalament en d'una facultat de Lemòtges improbabla d'anatz zo saubre (podetz escriure tanben Limòtges) o de Peiriguers (Peiriguers ente, de tota mena i pas de facultat vertadiera nonmas 'n'antena de Dret e una de Scienças Agricòlas e lu CNAM), una facultat occitana de l'avenidor ... una facultat que s'exprimaria en brava e plana linga lemosina.

Benleu a la Facultat de Lemòtges dins las annadas 2050, 'na facultat occitana d'avenidor.

E, en mai d'aquò, quo es un mejan bien brave de veire  e de tornar veire los meus cors en zo far aprofiechar de  la prima ad un "happy few" de lemosinejaires e d'occitanistas, tot çò qu'ai apres subre queu tema.

Ió dirai pas ente estudie, çai-que-de-lai ne balharai quauques bocins, mas ren, ren mas qu'en brava e plana linga lemosina.

A l'ora d'aurá , lu trachament dau trabalh , en periòde de crisi es d'actualitat, chau zo dire, la pensadissa subre las nòvas formas d'organisacion dau trabalh , las nòvas menas de teisser las relacions nòvas daus trabalhadors entre ilhs e la ierarchia, la prevencion e lu trachament de las crisis, la prevencion de l'estress (quina vita 'questa vita!), la prevencion daus "burn-out" e tota 'quela disciplina de las nòvas que se debana a l'entorn de la "clinica de l'activitat", disciplina desvolopada, per eisemple, per lu psicologue e cerchaire Yves Clot e tan d'autras e d'autres enquèra.

Laidonc, vos dise a tots e a totas, e vos desire 'na brava legida, 'na brava lectura dau prumier blòg (me pense) de psicologia dau trabalh e de las organizacions en linga occitana.

Vos desire a tots la benvenguda  e subretot la benvenguda a tots los comentaris, en occitan d'en prumier, òc de segur,(e maitot/tanben dins d'autras lingas romanicas, en angles, en aleman, mas , me pense que per lo russe o lu maghiar ma competencia de lector será un pauc febla).

A leu benleu. E hasta la vista !

Teodòr L.

Post Scriptum o Après Dire:

Dins lu debanament daus fiau subre la psicologia dau trabalh e de las organizacions, ió segrai 'queste planòu:

• Definicion d'una Organizacion
• Teorias de las Organizacions, 'n' agachada generala
• Los teoricians (e praticians) pam a pam:
• Prumiera tiera l'Escòla Classica: Weber, Taylor, Ford, Fayol.
• Dosesma tiera l'Escòla de las Relacions Umanas: Lewin, Mayo, Moreno, Mc Gregor, Argyris, Herzberg
• Tresesma tiera: Teorias de las Contengéncias Estructuralas: Burns, Stalker, Lawrence, Lorsch,
• L'analisi sistemica (a la seguida daus trabalhs de Ludwig von Bertalanffy)
• L'analisi socio-tecnica
• Las teorias economicas de l'organisacion i.e las de la decision (Herbert, Alexander, Simon)e  las modernas emb  l'analisi estrategica (annadas setanta): Crozier, Friedberg, Mintzberg.

E los vòstres comentaris, chars seguidors...benleu 'n'escòla occitana futura de psicologia dau trabalh e de las organizacions per naisser, en virtualitat minja pas de pan e còstará pas tròp char.

Deurian crear la prumiera Universitat Occitana ente tot s'ensenha a la nòstra mòda, qu zo sap? perque non  en la Vau d'Aran (chaudria damandar a Paco Boya). 'Magenatz quo l'"UOVA", l'"Universitat Occitana de la Vau d'Aran", coma un uòu ente tot ça que se ditz e tot ç`que se fai se fai ren mas qu'en brava linga nòstra e dins tot los seus parlars, "UOVA" perque "qu ten linga a Roma va" ...fuec de Diu, que siriá 'na vertadiera organizacion dau trabalh un pretzfach parier, non?